वर्धा : वाढत्या उन्हामुळे आगीच्या घटनांमध्ये सातत्याने वाढ होत असतानाच शहरातील वर्दळीचा असलेल्या महादेवपुरा परिसरातील शिव गादी भंडार या गादी कारखान्याला सोमवारी दुपारी १२ वाजताच्या सुमारास भीषण आग लागली. आगीत दुकानातील लाखो रुपयांचे साहित्य तसेच कापसाच्या गाठी जळून कोळसा झाल्या. आगीवर नियंत्रण मिळविण्यासाठी अग्निशमन दलाला पाचारण करण्यात आले होते. अथक परिश्रमानंतर आगीवर नियंत्रण मिळविण्यात यश आले. ही आग शॉर्टसर्किटने लागल्याचा अंदाज वर्तविला जात आहे.
चेतन गियानी यांच्या मालकीचे महादेवपुरा परिसरात शिव गादी भंडार आहे. या दुकानात गादी बनविण्यासह फर्निचरचे सर्व साहित्य बनविण्याचे काम केले जातात. दररोजप्रमाणे दुकानात कामकाज सुरू असतानाच दुपारी १२ वाजताच्या सुमारास अचानक आग लागली. धूर निघू लागला, पाहता-पाहता आगीने रौद्ररुप धारण केल्याने आग दुकानात पसरली. आगीचे लोळ उठताना दिसताच दुकानात काम करणाऱ्यांनी हाती येईल ते साहित्य बाहेर काढले. मात्र, आगीने अख्खे दुकानच कवेत घेतल्याने सर्व साहित्याचा कोळसा झाला. आगीमध्ये तळमजला तसेच पहिल्या माळ्यावरील साहित्य तसेच यंत्रसामग्री जळून खाक झाली.
